Chhota Bada Na Koi Jag Mein, Karm Hi Shreshth Banata Hai

Har Prani Se Prem Badhale, Samras Man Ho Jata Hai

Kar Kartavya Karm Badhta Chal, Apni Manzil Pane Ko

Niyat Karm Puja Hai Teri, Bhav Dukh Paar Karane Ko

Par Hit Saris Dharm Nahin Dooja, Agar Samajh Tu Jayega

Manav Ki Sewa Karne Mein, Tera Man Ram Jayega

Treta Yug Mein Shriram Ne, Jag Ko Yahi Sikhaya Hai

Tuchchh Nishad Raj Ko Baahon, Mein Bhar Gale Lagaya Hai

Patra, Pushp, Phal Jo Shraddha Se, Arpan Karne Aaye Hain

Ber Bhilni Ke Joothe, Prabhu, Bade Prem Se Khaye Hain

Kapi Sugriv Raj Ko Apna, Sakha Bana Samman Diya

Rikshraj Shri Jamvant Ko, Apna Mantri Bana Liya

Pakshiraj Jatayu Ka, Kar Kamal Parash Uddhar Kiya

Samta Bhav Jagane Hari Ne, Vasundhara Par Janm Liya

Ripu Ke Bandhu Vibhishan Ko, Le Sharan Bharat Sa Prem Kiya

Sindhu Neer Mangwa Kar Karke, Tilak Lanka Ka Rajya Diya

Samta Bhav Yukt Jo Jan Hain, Wahi Purush Nishprih Rehte

Bin Abhilash Kiye Mil Jaye, Usmein Tript Hua Karte

Siddhi, Asiddhi Ubhay Mein Bhi Jo, Harsh Na Dukh Anubhav Karte

Madhukar Samta Rasamay Hain Ve, Jo Har Kshan Pramudit Rehte

Kuchh Vibhutiyan Mil Bharat Mein, Samrasta Failane Ko

Karne Lagin Prayatn Manavon, Ko Sanmarg Dikhane Ko

Rambhadracharya Jagadguru, Ne Gyanamrit Barsaya

Kya Hai Samrasta Jan Manas, Sammukh Vistrit Samjhaya

Samrasta Ka Bhav Jage To, Bhed Na Man Mein Ayega

Sab Hon Sukhi, Nirogi Jag Mein, Bhav Hriday Chhalkaega

Sabne Mil Sankalp Liya, Prativarsh Ye Jyoti Jalana Hai

Vishwa Guru Hai Bharat Puni, Jan Manas Gyan Jagana Hai